ع العود ... لعلى سلامة

لما كنت شاعر..
كان كل الغنا حزين
ولما بقيت عصفور..
كتروا الصيادين
ويوم ما قابلت قلبى..
ماعرفش أنا أبقى مين
طب أعمل إيه..
إيه.. إيه؟
لما كنت حلو..
ماكانش عندى كاميرا..
وقلت قشطة يا أبيض
حبتنى واحدة سمرة..
وكل ما أنوى أفوق
بترخص الخمرة..
طب أعمل إيه..
إيه.. إيه؟
لما كنت أسد
ماكانش فيه غابة..
ولما بقيت مفترى
مابقاش فيه ناس غلابة..
وعلى ما اكتشفت النبلة
كانوا اخترعوا الدبابة..
طب أعمل إيه..
إيه.. إيه؟
على ما افتكرت إنى حر
كان كل البلد عساكر أمن..
وقلت أعمل كحك العيد
لا لاقيت دقيق ولا سمن..
ولما بطلت أحب..
افتكرنى حبيبى وحن..
طب أعمل إيه..
إيه.. إيه؟
على ما فكرت ابنى بيت
كانوا باعوا كل الأراضى..
ويوم ما اندبحت..
لا لاقيت قانون ولا قاضى..
واصرخ وأقول بنغرق..
الناس تقولى عادى..
طب أعمل إيه..
إيه.. إيه؟

علــى سلامة