عيـــــــــــــــــــــــــــرة

عيرة

كتب على سلامة ١٢/ ١٢/ ٢٠١٠

الشعر عيرة..
والكحل عيرة..
والورد فوق الخد
ولحد الضفيرة..
عيرة..
الصبر عيرة..
والضحك عيرة..
والفرح والأحزان كمان
وحاجات كتيرة..
حتى الحنان جوه البيوت..
حتى الكلام
حتى السكوت..
حتى الهتاف جوه المسيرة..
برضه عيرة..
حيرنى حيرة..
بقينا ليه حبة حاجات..
قمصان بدل على بلونات..
مابقتش شايف إيه اللى جاى
وإيه اللى فات..
مابقتش أفرق..
أزرق ده ولا أحمر رمادى..
ودى كارثة ولا
ده وضع عادى..
ده طفل ولا راجل عجوز..
وده إيه ده راخر..
جايز..
يجوز..
نعسان ده ولا..
ساكت وساير..
بردان ده ولا..
ده دور وداير..
وده إحنا ولا..
الكل حاير..
الشعر عيرة..
والكحل عيرة..
والورد فوق الخد..
ولحد الضفيرة..
عيرة..