شوربة الجمبري بالخضراوات وسلطة الفواكه الشتوية على "سفرة دايمة

أعدها لكم: رحاب سليمان


في عزومتنا النهارده حبينا نلبّي كل طلباتكم اللي طلبتوها الفترة اللي فاتت..

وفي نفس الوقت حرصنا إنها تكون وصفات سهلة وسريعة وبسيطة..

العزومة النهارده هيكون فيها شوربة جمبري، وكيكة السمك، وسلطة الجزر على الطريقة المغربية، وسلطة الفواكه الشتوية..



*******************


اسلقي الجزر وضيفي عليه باقي المكونات
اسلقي الجزر وضيفي عليه باقي المكونات

سَلطة الجزر على الطريقة المغربية
المقادير:

* 1/ 2 كيلو جزر مقطّع مكعبات
* 1/ 2 كوب كزبرة وبقدونس مفرومين
* ملعقة صغيرة فلفل أحمر مطحون
* 1/ 2 كوب عصير ليمون
* 4 ملاعق زيت زيتون
* 4 فصوص ثوم مفرومين
* ملح وكمون


الطريقة:
1- حطّي الجزر في ميه على النار، وسيبيه لمدة 30 دقيقة، لغاية ما يتسلق.

2- شوّحي الثوم والبقدونس والكزبرة في طاسة فيها زيت على النار، وبعدين حطّي عليهم الملح والكمون، وقلّبيهم مع بعض لمدة 5 دقائق.

3- بعد كده ضيفي عليهم الجزر، وقلّبي كل المكونات مع بعض، لحد ما كله يختلط كويس، وبعدين ضيفي عصير الليمون، وقلّبيهم لمدة 3 دقائق تقريبا على النار، وبعدين ارفعيها من على النار، وقدّميها.. وبالهنا والشفا.



*******************


شوربة لذيذة وطريقتها سهلة
شوربة لذيذة وطريقتها سهلة

شوربة الجمبري بالخضراوات
المقادير:

* كيلو جمبرى صغير (ولو كبير قطّعيه نصفين)
* 2 كوب بطاطس مقطّعة مكعبات
* 1/2 كوب جزر مقطّع مكعبات
* 1/2 كوب بصل مقطّع مكعبات
* ملعقة صغيرة توابل للأسماك
* ملح وفلفل أسود
* كوب كريمة طبخ
* 2 عود كرفس
* 4 كوب لبن
* كوب ميه
* زبدة


الطريقة:
1- أول حاجة هتشوحي الجزر والبصل والكرفس في زبدة أو سمنة على نار متوسطة، لحد ما يستووا شوية والبصل لونه يبقى ذهبي، وبعدين حطّي الميه وقلّبي المكونات مع بعض على النار، وسيبيهم على النار لحد ما مقدار الميه يقل للنصف، وبعد كده اضربى الخليط ده في الخلاط.

2- اخلطي اللبن والبطاطس والتوابل والملح والفلفل في حلة، وحطّيهم على النار وسيبيهم يغلوا، بعد كدة قللي درجة الحرارة، وسيبي الخليط على النار لمدة عشر دقائق، وقلّبيه من وقت للتاني.

3- اضربي الكريمة وضيفيها على خليط اللبن وهو على النار، وسيبيهم يغلوا مع بعض شوية.

4- بعد كده حطي خليط الخضراوات اللي ضربتيه في الخلاط على خليط اللبن والكريمة، وسيبيهم يغلوا مع بعض، وبعدين حطّي الجمبري وسيبي الشوربة على النار لحد ما الجمبري يستوي، وبعد كده قدميها سخنة.. وبالهنا والشفا.



*******************


طريقة جديدة ولذيذة لتحضير السمك
طريقة جديدة ولذيذة لتحضير السمك

كيكة السمك
المقادير:

* 1/ 2 كيلو سمك فيليه
* 1/ 2 كيلو بطاطس مسلوقة ومهروسة
* ملعقة كبيرة شبت مفروم
* ملعقة صغيرة بشر ليمون
* ملعقة كبيرة عصير ليمون
* 2 عود كرفس مفروم
* بصلة صغيرة مفرومة
* 2 فنجان بقسماط
* 1/ 2 كوب دقيق
* ملح وفلفل أسود
* فنجان لبن
* 2 بيضة
* زيت


الطريقة:
1- افرمي السمك وضفيه على البطاطس المهروسة، ومعاه البصل والكرفس والشبت وبشر الليمون وعصير الليمون، وتبّليهم بالملح والفلفل الأسود، وقلّبيهم كويس أوي مع بعض، لغاية ما يبقى الخليط متماسك مع بعضه.

2- شكّلي من الخليط ده كور أو فطاير صغيرة على حسب الشكل اللي تحبيه، وحطّيها في الثلاجة لمدة نصف ساعة.

3- اضربي اللبن والبيض مع بعض في طبق صغير، وضيفي عليهم فلفل أسود.

4- بعد كده حطّي كور السمك في الدقيق، وبعدين اغمسيه في خليط البيض واللبن وآخر حاجة في البقسماط، وممكن تسيبي الكور شوية علشان تهدى وتتماسك مع طبقة البقسماط اللي عليه، علشان ماتفكش منك وإنت بتحمّريها.

5- حمّري كور السمك في زيت غزير ساخن على الجانبين لحد ما يبقى لونها ذهبي، وقدّميها.. وبالهنا والشفا.



*******************


ممكن تقدّمي معاها أي كيك عندك أو بولة آيس كريم
ممكن تقدّمي معاها أي كيك عندك أو بولة آيس كريم

سلطة الفواكه الشتوية
المقادير:

* 1/ 4 كيلو فراولة
* 2 ثمرة أناناس
* 2 ثمرة تفاح
* 3 ثمرات موز
* 2 ثمرة كيوي
* 2 ثمرة كمثرى
* 2/ 3 كوب سكر بني
* 1/ 4 ملعقة صغيرة جوزة الطيب
* 1/ 4 ملعقة صغيرة قرفة
* 1/ 3 كوب زبدة


ملحوظة: ممكن تستعملي فاكهة معلبة أو تكوني حافظاها عندك في الفريزر، أو أي فاكهة من الفواكه اللي موجودة في الموسم.

الطريقة:
1- قطّعي كل الفاكهة واخلطيها في طبق كبير.

2- اخلطى باقي المكونات، وضيفيها على الفاكهة، ودخّليها الفرن على درجة حرارة 325 لمدة 20 دقيقة، وقدميها وهي سخنة، وممكن تقدّمي معاها أي كيك عندك أو بولة آيس كريم.. وبالهنا والشفا.



وبكده تكون خلصت عزومتنا النهارده
أتمنى إنها تكون عجبتكم
وتجرّبوا كل الوصفات اللي قدّمناها
وتبعتوا تقولوا لنا النتيجة كانت إيه

عزومة هايله
وروعة
تسلم ..
وشكراً